Á sunnudaginn voru mörg þúsund manns samankomnir á menningarhátíð í miðborg Stokkhólms. Um klukkan 22 fannst dularfull taska á hátíðarsvæðinu í Kungsträdgården. Lögreglan lokaði í kjölfarið stóru svæði af og vísaði fólki á brott.

Lögreglan staðfesti í gær við Sænska ríkisútvarpið að sprengja hefði verið í töskunni.

Sprengjusérfræðingar rannsökuðu töskuna og töldu innihald hennar hættulegt. Þeir eyddu sprengjunni á vettvangi um klukkan 1 aðfaranótt mánudags með því að skjóta á sprengiefnið í henni. Úr varð töluvert mikil sprenging.

Í fréttatilkynningu frá lögreglunni kemur fram að málið sé nú til rannsóknar og ekki liggi fyrir hversu öflug sprengjan var.

Enginn hefur verið handtekinn vegna málsins.