Vínþjófarnir, karl og kona, stálu víninu af veitingastaðnum og hótelinu Atrio í Cáceres á Spáni. Um dýrt franskt vín var að ræða, þar á meðal flösku af Château D‘Yguem frá 1806.
The Guardian segir að samkvæmt því sem segi í tilkynningu frá spænsku lögreglunni hafi þjófnaðurinn verið vandlega skipulagður. Parið hafi skráð sig inn á hótelið og hafi konan framvísað fölsuðum svissneskum skilríkjum. Þau hafi síðan snætt kvöldverð á veitingastað hótelsins og farið í skoðunarferð um frægan vínkjallara veitingastaðarins.
Eftir það hafi þau farið inn í herbergið sitt en maðurinn hafi fljótlega farið aftur í vínkjallarann. Hann hafi notað lykil, sem hafði verið útbúin áður, til að komast inn í kjallarann. Þaðan kom hann út með þrjá stóra bakpoka, einn á bakinu og hina í höndunum. Í þeim voru vínflöskurnar vafðar inn í handklæði. Á meðan maðurinn gerði þetta dró konan athygli starfsfólks að sér með því að biðja um mat þrátt fyrir að eldhúsið væri lokað. Fólkið yfirgaf hótelið síðan klukkan 05.30 næsta morgun.
Eftir níu mánaða rannsóknarvinnu og eltingarleik við parið tókst lögreglunni að hafa uppi á þeim og handtaka á landamærum Svartfjallalands og Króatíu. Um samvinnuverkefni nokkurra lögregluliða var að ræða og einnig komu Alþjóðalögreglan Interpol og Evrópulögreglan Europol að málinu.
