Eitt eftirminnilegasta atriðið í þáttunum Verbúðin sem sýndir voru nýverið á RUV var þegar Svala Jóhannsdóttir kom fram sem nektardansmærin Susan Haslund og baðaði sig meðal ballgesta.

Svala er í viðtali í Fréttablaðinu í dag þar sem hún segist hafa verið stressaðri fyrir því að tala dönsku en að vera nakin í mynd.

Yngri kynslóðin saup hveljur yfir atriðinu enda aðeins þau sem eldri voru sem mundu eftir Susan og öðrum nektardansmeyjum sem skemmtu landanum á árum áður.

Og vegna ýmissa breytinga á samfélaginu og viðhorfum þurfti Svala að undirbúa sig fyrir hlutverkið á óvenjulegan hátt. „Já, ég safnaði hári fyrir hlutverkið. Undir höndum og að neðan!“ segir Svala í samtali við Fréttablaðið. „svo fíla ég bara mjög vel að hafa hár undir höndunum og hef haldið því síðan.“

Svala heldur úti afar vinsælum Instagramreikningi – icelandicselkie – og er með yfir 86 þúsund fylgjendur þar sem hún birtir af sér djarfar og listrænar myndir.

Hún og vinkonur hennar hafa stofnað burlesquehópinn Earthly Delights og halda þær sýningu á Gauknum að kvöldi skírdags. Hópurinn samanstendur af fjórum þokkafullum og tælandi dans- og söngmeyjum þeim Miss Mimi, [‘n?ks], Tempest og Mömmu Satan, en sú síðastnefnda er hliðarsjálf Svölu. Hægt er að kaupa miða á Tix.