Landsréttur dæmdi í dag Önnu Kolbrúnu Árnadóttur, fyrrverandi þingmann Miðflokksins, til að greiða dönsku innheimtufyrirtæki andvirði tæplega 12 milljóna íslenskra króna auk rúmlega 8% vaxta frá árinu 2016. Upphæðin í dönskum krónum er 623.280,74.
Héraðsdómur hafði dæmt Önnu Kolbrúnu til greiðslu mun lægri upphæðar, 68.561 danska krónur, sem er andvirði rúmlega 1,3 milljóna íslenskra króna.
Málið á rætur sína að rekja til húsnæðisláns sem Anna Kolbrún tók í Danmörku vegna eignar sem hún síðar seldi. Gert var samkomulag um greiðslu eftirstöðva lánsins sem fól í sér afslátt af kröfunni ef Anna Kolbrún stæði við greiðslur. Aðila greindi á um hvort virða ætti samkomulagið en en lánveitandinn var yfirtekinn af danska fjármálaeftirlitinu og var hluti af fyrirtækinu selt til Noreda bankans.
Innheimtufyrirtækið Lowell Danmark A/S er eigandi kröfunnar sem er tilkomin vegna þess að Anna Kolbrún stóð ekki í skilum með afborganir af láninu. Ágreiningur hefur verið um hvort Lowell væri réttmætur eigandi allrar kröfunnar. Í héraðsdómi þótti ósannað að innheimtufyrirtækið danska hefði fengið framselt annað og meira en sem nemur andvirði um 1,3 milljóna íslenskra króna.
Bæði Anna Kolbrún og danska innheimtufyrirtækið áfrýjuðu til Landsréttar. Var það niðurstaða Landsréttar að ganga að fullu að kröfum Dananna og er Anna Kolbrún dæmd til að greiða þeim fyrrgreinda upphæð sem slagar upp í 12 milljónir og við það bætast háir dráttarvextir. Auk þess þarf Anna Kolbrún að greiða 1,2 milljónir í málskostnað.
