Morgunblaðið skýrir frá þessu í dag. Fram kemur að þessi skerðing komi sér illa fyrir hagkerfið. Haft er eftir Sigurði Hannessyni, framkvæmdastjóra Samtaka iðnaðarins, að það sé mikið umhugsunarefni að þessi staða sé komin upp.
Í upphafi átti skerðingin að hefjast í janúar en í tilkynningu frá Landsvirkjun segir að hún komi fyrr til framkvæmda en ætlað var því geta flutningskerfisins á Norðausturlandi til álagspunkta á Suðvesturlandi sé fullnýtt.
Haft er eftir Sigurði að þessi staða komi sér sérstaklega illa á tíma þar sem hrávöruverð sé hátt, með hliðsjón af yfirvofandi grænum orkuskiptum. „Skerðingin kemur illa við íslenskt efnahagslíf og við hagkerfi Íslands,“ sagði hann og bætti við að hún muni draga úr framleiðslu og verðmætasköpun.
Hann sagði það rétt upp að ákveðnu marki að flutningskerfið sé ekki nægilega skilvirkt en það þurfi að afla meiri orku. „Flutningskerfið er sannarlega eitthvað sem þarf að skoða og bæta en það breytir ekki því að það þarf að afla meiri orku á landinu vegna þess að eftirspurnin er sannarlega til staðar og líka með hliðsjón af loftslagsmálunum þar sem eftirspurn eftir grænni orku er að aukast á heimsvísu,“ sagði hann.
Guðmundur Ingi Ásmundsson, forstjóri Landsnets, sagði að flutningsgeta byggðalínunnar, sem tengir virkjanir á suðurhluta landsins við norðausturhornið, sé takmarkandi þáttur. Aðalástæðan fyrir því séu miklar tafir á framkvæmdum Landsnets vegna leyfisveitinga. „Við höfum lagt áherslu á að það þurfi að einfalda ferlið við leyfisveitingar og gera það skilvirkara og tryggja að niðurstaða fáist í leyfisveitingaferlið,“ er haft eftir honum.
