Hægfara flóðbylgja. Gæti orði næst algengasta dánarorsökin í heiminum. Þannig lýsa Alþjóðabankinn og Mads Krogsgaard Thomsen, forstjóri Novo Noridsk Fonden, vaxandi sýklalyfjaónæmi um allan heim. Árlega deyja um 750.000 manns af völdum sýkinga sem sýklalyf vinna ekki á. Ástæðan er að fólkið hefur smitast af fjölónæmum bakteríum. Alþjóðaheilbrigðismálstofnunin telur að um miðja öldina muni um 10 milljónir deyja árlega af völdum fjölónæmra baktería en það eru fleiri en deyja af völdum krabbameins í dag.

„Þetta virðist ekki vera mikið í ljósi þess að COVID-19 hefur orðið fjórum milljónum að bana. Sannleikurinn er því miður bara sá að ef ekkert verður að gert munu 10 milljónir látast árlega um miðja öldina vegna skorts á nýjum sýklalyfjum. Það eru tvöfalt fleiri en deyja af völdum sykursýki í dag og fleiri en deyja af völdum krabbameins í dag,“ sagði Thomsen í samtali við Finans og sagði að þetta vandamál sé „næst algengasta dánarorsökin á eftir hjarta- og æðasjúkdómum“.

Það er því um að ræða stórt og mikið heilbrigðisvandamál sem getur hugsanlega orðið stærra en krabbamein og COVID-19 hvað varðar fjölda dauðsfalla og kostnaðar. Ef ekkert verður að gert núna er hætta á að afleiðingarnar verði skelfilegar.

Vandinn sem við stöndum frammi fyrir er að fjölónæmum bakteríum, sem eru bakteríur sem eru ónæmar fyrir sýklalyfjum, fjölgar sífellt um allan heim. Ástæðan er vaxandi notkun á sýklalyfjum í heilbrigðiskerfinu og matvælaiðnaðinum. Það bætir ekki úr að ekki er að sjá að nýjar tegundir sýklalyfja séu á leið á markaðinn í fyrirsjáanlegri framtíð.