Eins og greint var frá fyrr í dag hefur starfsmaður á leikskólanum Sælukoti verið kærður fyrir kynferðisbrot gegn fjögurra ára barni. Móðir stúlku sem var í leikskólanum tilkynnti brotið en starfsmaðurinn starfaði þrátt fyrir það áfram á leikskólanum. Móðirin kærði starfsmanninn á endanum en hún ræddi nánar um málið við Vísi.
Móðirin segir að fyrsta atvikið hafi átt sér stað í september í fyrra, þá var dóttir hennar aðeins þriggja ára gömul. Móðirin segir rekstraraðila leikskólans hafa ákveðið að yfirheyra dóttur sína vegna málsins og að niðurstaðan í því hafi verið sú að um draum hafi verið að ræða.
„Svo nokkrum vikum seinna sæki ég barnið í leikskólann og hún kemur inn í bíl grátandi og segir mér frá því að hún vilji ekki knúsa þennan starfsmann og að rekstraraðilinn hafi látið hana knúsa hann. Hljómaði eins og að hún hafi verið að láta þau sættast,“ segir móðirin í samtali við Vísi.
Dóttir hennar byrjaði að sýna kynferðislega hegðun í sumar en hún sagðist hafa lært hegðunina af starfsmanninum. Móðirin tilkynnir málið þá til barnaverndar en það var í annað sinn sem hún gerir það. Hún fór þá fram á að starfsmaðurinn yrði sendur í leyfi á meðan verið var að rannsaka málið.
Starfsmaðurinn var í kjölfarið sendur í leyfi en rekstrarstjóri leikskólans hringdi reglulega í móðurina til að athuga hvort starfsmaðurinn mætti koma aftur í vinnuna. „Á meðan er hún að hringja í mig nánast daglega og spurja hvenær hann megi koma aftur í vinnuna og hann sé svo þunglyndur yfir þessu öllu saman. Segir að hann gæti ekki hafa gert þetta því hann grét svo mikið þegar hún talaði við hann.“
Dóttir hennar sagði frá alvarlegasta atvikinu í sumar og í kjölfarið ákvað móðirin að taka hana úr leikskólanum. Hún kærði málið þá til lögreglu og sagði öðrum foreldrum í skólanum hvað hafði gerst. Foreldrar barna í leikskólanum vilja þá að haldinn sé foreldrafundur vegna málsins.
„Þar meðal annars koma fram nýjar reglur um að það megi ekki kyssa börnin á munninn og að starfsfólk megi ekki fara eitt af lóðinni með börnin.“
