Cristiano Ronaldo hefur ekki áhyggjur af gengi Manchester United í deildinni í síðustu leikjum og lofar stuðningsmönnum að hann ætlar að vinna titil fyrir félagið og þagga niður í þeim sem efast um hann.

Ronaldo hefur oft verið gagnrýndur fyrir að taka ekki nægan þátt í pressu og varnarvinnu og setur þar með auka álag á liðsfélaga sína. Hann er ekki sammála þeim gagnrýnisröddum.

„Ég veit hvenær liðið þarf á mér að halda varnarlega. En mitt hlutverk í klúbbnum er að vinna, hjálpa liðinu að vinna og skora mörk,“ sagði Ronaldo við Sky Sports.

„Sumir sjá það ekki vegna þess að þeim líkar ekki við mig en ef ég á að vera hreinskilinn þá er ég 36 ára og hef unnið allt, ætti ég að fara að sofa með áhyggjur af því hvað fólk er að segja um mig?“

„Gagnrýnin er hluti af þessu og ég hef ekki áhyggjur af því, ég sef frábærlega. Ég sé það bara á jákvæðan hátt, ef þeir tala um mig þá er það af því að ég gef ennþá mikið af mér og hjálpa liðinu.“