Halldór Smári Sigurðsson, leikmaður Íslandsmeistara Víkings, lýsti skemmtilega sambandi reynsluboltanna Sölva Geirs Ottesen og Kára Árnasonar við þrjá af yngri leikmönnum liðsins, þá Kristal Mána Ingason, Adam Ægi Pálsson og Loga Tómasson í hlaðvarpsþættinum Dr. Football í gær.
Kári er 39 ára gamall og Sölvi 37 ára. Báðir lögðu þeir skóna á hilluna eftir tímabilið sem kláraðist nýlega. Á móti kemur er Kristall 19 ára, Logi 21 árs og Adam 23 ára.
,,Þetta er alveg hræðilegur þristur, þeir þrír (Adam, Kristall og Logi). Þeir eru svo grillaðir allir saman,“ sagði Halldór Smári í þættinum.
Hann hélt áfram. ,,Það sem er búið að skjóta á þá í sumar og það sem þeir hafa mátt þola frá sérstaklega Kára og Sölva, það er í rauninni virðingarvert að hafa tekið við þessu og ekki bara hætt.“
Talið barst þá að því þegar Kristall sagði, góðlátlega, á dögunum að Kári og Sölvi væru leiðinlegastir í liðinu.
,,Það er búið að vera að djöflast svo í honum síðan hann kom. Hann dýrkar þá náttúrulega en honum finnst þeir fokking leiðinlegir. Hann var að segja sannleikann þarna,“ sagði Halldór Smári um það.