Atvikið átti sér stað þann 11. október síðastliðinn í Mamba-rússíbananum í Worlds of Fun-skemmtigarðinum. Rússíbaninn nær allt að 120 kílómetra hraða en sætisbelti stúlkunnar losnaði strax í fyrstu brekkunni.
Chris og Cassie Evins, sem sátu í sætinu fyrir framan, sögðust hafa heyrt neyðaróp stúlkunnar og í fyrstu talið að hún væri óvön því að fara í rússíbana.
„Ég hef aldrei heyrt svona skræki áður,“ segir Chris í frétt KCTV5 í Bandaríkjunum. Hann áttaði sig á að ekki var allt með felldu þegar stúlkan hrópaði að beltið hennar hefði losnað.
„Ég vafði handleggnum undir öryggisgrindina, bilið á milli hennar og grindarinnar var ansi stórt. Ég vafði handleggnum undir grindina og greip um úlnlið hennar á meðan Cassie þrýsti niður fótunum á henni.“
Hjónin eru með árskort í garðinum og þekkja þennan rússíbana vel og vissu þau að fram undan væru brekkur og beygjur sem hefðu auðveldlega getað fleygt stúlkunni úr sætinu ef ekkert yrði gert.
„Við færðum okkur til þannig að í stað þess að halda henni bara, þrýstum við niður á allan líkamann hennar til að koma í veg fyrir að hún lyftist úr sætinu þegar við fórum upp og niður brekkurnar,“ sagði Chris.
Að sögn fjölmiðla tókst Evins-hjónunum að halda stúlkunni öruggri þar til rússíbaninn stöðvaði.
Myndavél við tækið, sem venjulega fangar gleðióp farþega, sýndi að þessu sinni örvæntingarfull andlit hjónanna og logandi hrædda stúlku sem augljóslega óttaðist mjög um líf sitt.
Eftir ferðina tilkynntu þau atvikið tafarlaust til starfsfólks garðsins og var rússíbaninn lokaður á meðan öryggisskoðun fór fram.
Daily Mail vísar í frétt Kansas City Star þar sem fram kemur að síðasta reglubundna skoðun Mamba hafi farið fram þann 25. apríl síðastliðinn.
Eftir atvikið þann 11. október voru gerðar nokkrar viðbótarskoðanir, þar á meðal 30. október, þar sem nokkur belti eru sögð hafa fundist sem voru ekki í fullkomnu lagi, að sögn Mike O’Connell, talsmanns öryggismála í Missouri. Talsmaður skemmtigarðsins segir að búið sé að bregðast við öllum athugasemdum.
