Cristiano Ronaldo hefur aftur gagnrýnt fyrrum félag sitt Manchester United og varað við því að stjóri liðsins, Ruben Amorim, geti ekki gert kraftaverk á meðan félagið skortir uppbyggingu og stefnu.

Í nýju viðtali við Piers Morgan í þættinum Piers Morgan Uncensored lýsti Ronaldo yfir vonbrigðum sínum með stöðuna á Old Trafford og sagði að honum þyki miður að sjá félagið í núverandi ástandi.

„Amorim er að gera sitt besta. En hvað geturðu gert? Kraftaverk? Kraftaverk eru ómöguleg og hann mun ekki framkvæma slíkt,“ sagði Ronaldo.

Þrátt fyrir að Amorim hafi komið United upp í fjórða sæti og aðeins tveimur stigum frá öðru sæti eftir tíu umferðir segir Ronaldo að liðið vanti sterkari innviði og framtíðarsýn.

„Þeir eiga góða leikmenn, en sumir skilja ekki hvað Manchester United stendur fyrir. Félagið hefur ekki lengur skipulagið sem það hafði þegar menn eins og Nicky Butt, Gary Neville, Roy Keane og Beckham voru að koma upp,“ bætti hann við.

Ronaldo hrósaði þó stuðningsmönnum félagsins og sagðist áfram bera miklar tilfinningar til United.

„Ég elska þetta félag og það verður alltaf í hjarta mínu. En við verðum að vera hreinskilin, liðið er ekki á réttri leið. Það þarf breytingar, ekki bara hjá leikmönnum og stjóranum, heldur í allri uppbyggingu félagsins.“