Frakkar eru Þjóðadeildarmeistarar eftir sigur á Spánverjum í úrslitaleiknum í A-deild í gær. Fyrri hálfleikur var rólegur og var markalaust eftir hann.
Í þeim seinni var töluvert meira fjör. Mikel Oyarzabal kom Spánverjum yfir á 64. mínútu með marki eftir stungusendingu frá Sergio Busquets. Frakkar voru ekki lengi að jafna. Það gerði Karim Benzema á 66. mínútu með frábærri afgreiðslu. Kylian Mbappe skoraði sigurmark leiksins fyrir Frakka á 80. mínútu. Hann fékk sendingu inn fyrir frá Theo Hernandez. Það var rangstöðulykt að markinu en myndbandsdómgæslan setti ekki út á það.
Stuðningsmenn Manchester United eru áhyggjufullir eftir leikinn en Raphael Varane fór meiddur af velli. Þesi franski varnarmaður fór af velli í fyrri hálfleik.
Varane gekk í raðir United í sumar og hefur átt ágætis spretti í hjarta varnarinnar. Nú er möguleiki á að hann verði talsvert lengi frá.
Fyrir er Harry Maguire meiddur og því gæti vantað báða mennina sem Ole Gunnar Solskjær vill hafa í byrjunarliði sínu um helgina. United mætir Leicester á laugardag.
