Í dag fór fram útför Styrmis Gunnarssonar, fyrrverandi ritstjóra Morgunblaðsins, en hún fór fram í Hallgrímskirkju og var fjöldi fólks viðstatt athöfnina ásamt þess að henni var streymt til þeirra sem ekki gátu mætt. Styrmir lést þann 20. ágúst síðastliðinn.

Margir hafa fallegar og yndislegar sögur að segja af Styrmi og hafa einhverjir þeirra deilt þeim á samfélagsmiðlum seinustu daga. Meðal þeirra er Hanna Katrín Friðriksson, þingmaður Viðreisnar, sem starfaði hjá Morgunblaðinu þegar Styrmir var þar.

Hanna kynntist Ragnhildi Sverrisdóttur, eiginkonu sinni, þegar hún starfaði hjá Morgunblaðinu. Styrmir reyndist þeim mjög góður á þeim tíma og svo þegar þær fluttu til Bandaríkjanna.

„Þegar ég sagði upp störfum 1999 til að fara í framhaldsnám til Bandaríkjanna, samdi Styrmir við Ragnhildi um að taka að sér fjarblaðamennsku. Ragnhildur var því blaðamaður Morgunblaðsins áfram þau ár sem við bjuggum vestra. Ég veit að fólk deplar ekki augum nú við þessar upplýsingar, en trúið mér, þetta voru tíðindi í þá daga,“ segir Hanna en á meðan þær voru úti eignuðust þær tvíbura saman.

Hanna gekk með börnin en þau fæddust fyrir tímann. Ragnhildur hafði lítil réttindi til fæðingarorlofs þar sem það var ekki algengt á þeim tíma að tvær konur væru að eignast börn saman.

„Það stöðvaði ekki Styrmi; Ragnhildur skyldi fá fæðingarorlof, skárra væri það. Þessi stuðningur Styrmir og Morgunblaðsins við okkur Ragnhildi á erfiðum tímum var ómetanlegur. Það er með svona ákvörðunum og aðgerðum sem fólk getur sér gott orðspor,“ segir hún að lokum.