Systir Cristiano Ronaldo gerði lítið úr Juventus á dögunum og er ítalska pressan vægast sagt óánægð með ummæli hennar. Cristiano Ronaldo yfirgaf ítalska stórveldið á dögunum og samdi við Manchester United.
Ronaldo gerði garðinn frægan hjá Manchester United á sínum tíma, hann spilaði fyrir liðið frá 2003 til 2009 og varð að stórstjörnu hjá félaginu. Hann var svo keyptur til Real Madrid fyrir metfé þar sem hann náði ótrúlegum árangri. Ronaldo samdi við Juventus sumarið 2018 og ætlaði að hjálpa félaginu að vinna Meistaradeildina en það tókst ekki.
Katia Aveiro, eldri systir Ronaldo, setti inn mynd af Ronaldo snúa heim til Manchester og skrifaði: „Velkomin heim elskan, velkomin á stað sem þú átt skilið að vera á.“
Þessi ummæli virðast hafa farið illa í ítölsku pressuna en Gazzetta dello Sport var sérstaklega ósátt með ummælin og sakaði systur Ronaldo um að reyna stöðugt að gera lítið úr félaginu.
