„Vegna yfirlýsingar KSÍ í gær er ljóst að það á að láta einn mann axla ábyrgð á gjörðum KSÍ og halda að það nægi. Við sem þjóð sjáum í gegnum þann gjörning,“ segir í yfirlýsingu frá Bleika fílnum og aðgerðarhópurinn Öfgar.
Guðni Bergsson sagði upp störfum sem formaður KSÍ í kjölfar þess hvernig hann og KSÍ brugðust við ásökunum um kynferðisbrot landsliðsmanna. Maraþonfundir fóru fram í Laugardalnum um helgina þar sem stjórn sambandsins fundaði.
Allt starfsfólk sambandsins var boðað til fundar eftir að Guðni tók ákvörðun um að stíga til hliðar. Íslenska karlalandsliðið er á leið í verkefni en liðið á þrjá heimaleiki á næstu dögum, málið mun án nokkurs vafa fá mikla athygli í undirbúningi fyrir leikina.
Í yfirlýsingu frá hópunum kemur að Guðni Bergsson geti ekki einn borið ábyrgð í slíku máli. „Spilling sem þessi viðgengst ekki vegna eins manns auk þess sem þessi eitraða menning hefur verið við lýði mun lengur en Guðni hefur starfað innan KSÍ.“
Í yfirlýsingunni kemur fram að fleiri en Guðni hafi fengið ábendingu um ofbeldi í garð Þórhildar Gyðu Arnarsdóttur sem steig fram fyrir helgi.
„Klara Bjartmarz fékk hið umdeilda bréf, það eru til sannanir fyrir því. Samt neitar hún fyrir það. Hún segist ekki hafa horft á Guðna í Kastljósi, hver trúir því? Í alvörunni Klara, ef allt þetta gat viðgengist án þinnar vitundar, þá hlýturðu að sjá að þú ert ekki starfi þínu vaxin. Stjórnin verður að víkja, það sér það hver sál,“ segir í yfirlýsingu hópsins.
Borghildur Sigurðardóttir varaformaður KSÍ er svo dregin til ábyrgðar af Bleika fílnum og Öfgum. Þar er sagt að Borghildur hafi ætlað að þaga um málefni Jóns Þórs Haukssonar sem var vikið úr starfi kvennalandsliðsþjálfara á síðasta ári. Jón Þór var sakaður um að hafa niðurlægt landsliðskonur í knattspyrnu og var Borghildur á staðnum.
„Að auki eru til heimildir fyrir því að annar varaformaður KSÍ var í gleðskap með kvennalandsliðinu þar sem þjálfarinn gerðist sekur um ólíðandi framkomu. Henni fannst það ekki eiga erindi við aðra í stjórn KSÍ og þagði með honum. Hann var látinn fara stuttu seinna,“ segir í yfirlýsingunni.
Hópurinn boðar til mótmæla fyrir utan Laugardalsvöll á fimmtudag þegar Ísland mætir Rúmeníu í undankeppni HM. „Það þarf að uppræta þessa eitruðu menningu. Það verður ekki gert með sömu stjórn og hefur viðhaldið henni. Íslensk knattspyrna og þolendur eiga betra skilið. Við boðum því til friðsamlegra mótmæla næsta fimmtudag 2. september klukkan 17:00. Yfirskrift mótmælanna er „Stjórnin út“. Þið megið geta tvisvar hvar.“
