Þórður Snær Júlíusson, ritstjóri Kjarnans, segir að sögusagnir um ósæmilega hegðun og meint ofbeldi landsliðsmanna í fótbolta hafi flakkað milli fólks í mörg ár. Þetta kemur fram í leiðara hans sem birtist á miðlinum í dag, þar sem hann fer yfir mál KSÍ.

Hann segir að sögusagnir um þá varði til að mynda gróft heimilisofbeldi, stafræn kynferðisbrot, nauðganir og brot gegn barnungum stúlkum. Sum þessara meintu brota eiga að hafa átt sér stað í landsliðsferðum.

„Þessi strákar, gulldrengirnir sem komu litla íslenska landsliðinu á EM og HM, áttu að eiga sér skuggahliðar. Hvíslað var um að innan KSÍ hafi verið vitneskja um ýmislegt sem leikmennirnir áttu að hafa gert, og að sumt hafi verið framið á meðan að þeir voru í landsliðsferðum á vegum sambandsins.“

Þórður ræðir þá hvernig þessi mál komust hjá því að enda í fjölmiðlum. Snnanir líkt og myndbönd hafi átt að vera fyrir hendi, en samt hafi ekkert gerst. Hann talar um að þagnarmúr hafi verið reistur í kringum landsliðsmennina sem eiga að hafa brotið af sér, og þeir orðið ósnertanlegir. Hann segir að meðvirknin hafi verið áberandi hjá ákveðnum íþróttafréttamönnum.

„Fórnarlömb áttu að vera búin að fara í viðtöl við stóra íslenska fjölmiðla þar sem opinbera átti allt. Til áttu að vera óyggjandi sannanir, jafnvel myndbandsupptökur, sem sönnuðu sekt þeirra. Og svo framvegis.

Samt gerðist ekkert. Þeir fjölmiðlar sem fóru af stað í að skoða þessi máli komust lítið áfram. Nær ómögulegt var að fá nokkuð staðfest. Þagnarmúr var reistur í kringum gulldrengina. Þeir virtust ósnertanlegir og farið var með þá eins og hálfguði. Sýnilegust var meðvirknin hjá ýmsum íþróttafréttamönnum, sérstaklega þeim sem treystu á sambönd til að tryggja gott aðgengi að landsliðinu og landsliðsmönnunum og áframhaldandi beina þátttöku í „ævintýrinu“. “

Það sem að breytti þessu öllu að mati Þórðar var þegar Gylfi Þór Sigurðsson var handtekinn í sumar, vegna meints kynferðisbrots gagnvart barni. Þá hafi „boltinn farið að rúlla,“ segir hann og bætir við: „Og að aðrir gulldrengir sem töldu sig hafa komist upp með brot gætu orðið fyrir honum.“