Tvær breytingar hafa verið gerðar á leikmannahópi A landsliðs karla frá hópnum sem gefinn var út á miðvikudag. Kolbeinn Sigþórsson og Rúnar Már Sigurjónsson verða ekki með í leikjunum sem eru framundan, þremur heimaleikjum gegn Rúmeníu, Norður-Makedóníu og Þýskalandi. Inn í hópinn koma þeir Viðar Örn Kjartansson og Gísli Eyjólfsson.

Kolbeinn var tekinn út úr hópnum af KSÍ en Rúnar valdi sjálfur að draga sig úr honum samkvæmt fréttum.

Viðar Örn hefur skorað 4 mörk í 28 A-landsleikjum og lék síðast með liðinu í nóvember 2020. Gísli lék sína fyrstu tvo A-landsleiki fyrr á þessu ári, vináttuleiki gegn Mexíkó og Póllandi.

Íslenska liðið kemur saman á mánudag til að hefja sinn undirbúning fyrir þessa mikilvægu leiki í undankeppni HM 2022
.
Mikill stormur hefur verið í kringum knattspyrnusambandið síðustu daga vegna meintra kynferðisbrota landsliðsmanna.

Guðni Bergsson sagði af sér sem formaður KSÍ í dag. Stjórn KSÍ hefur fundað alla helgina. Guðni hefur fengið að finna fyrir því á samfélagsmiðlum eftir að Þórhildur Gyða Arnardóttir steig fram í fréttum RÚV á föstudag og greindi frá því að árið 2017 hafi þekktur landsliðsmaður áreitt hana kynferðislega og ráðist svo á hana, og sagði að Guðna og KSÍ hafi verið vel kunnugt um málið.

Fréttastofa RÚV ræddi aftur við Guðna vegna málsins í ljósi frásagnar Þórhildar og spurði hvernig stæði á því að hann hafi á fimmtudag sagt að engin tilkynning hafi borist sambandinu um kynferðisbrot landsliðsmanna. Umræddur landsliðsmaður greiddi Þórhildi bætur vegna málsins. Guðni hafði ítrekað fullyrt að engar ábendingar um svona hegðun landsliðsmanna hefðu komið á borð KSÍ undir hans stjórn.