Ráðandi hluthafar í Skeljungi skoða nú að breyta félaginu þannig að verði skráð fjárfestingafélag. Til þess þarf að gera breytingar á samþykktum félagsins. Hugmyndirnar hafa verið kynntar fyrir lífeyrissjóðum sem eru meðal hluthafa. Ef af verður, verður félagið áfram skráð á markað.

Markaður Fréttablaðsins skýrir frá þessu í dag. Fram kemur að stjórnendur og hluthafar, sem fara með ráðandi eignarhlut í Skeljungi, skoði nú hvort gera eigi breytingar á samþykktum félagsins þannig að kveðið verði á um að megintilgangur þess sé fjárfestingastarfsemi. Félagið rekur nú meðal annars rúmlega 60 bensínstöðvar undir merkjum Orkunnar.

Markaðurinn segist hafa heimildir fyrir að Jón Ásgeir Jóhannesson, stjórnarformaður Skeljungs, hafi fundað með lífeyrissjóðum, sem eru meðal stærstu hluthafanna í félaginu, í síðustu viku og kynnt þeim hugmyndir þessa efnis.

Til að þetta geti orðið að veruleika þurfa hluthafar, sem ráða yfir að minnsta kosti 66,7% hlutafjár í félaginu, að samþykkja það. Stærsti hluthafi félagsins frá því í byrjun ársins er félagið Strengur en það á rúmlega 50% hlut. Jón Ásgeir, Ingibjörg Pálmadóttir, eiginkona hans, og Sigurður Bollason, fjárfestir, eru í forystu félagsins.

Markaður Fréttablaðsins segir að forsvarsmenn Strengs og stjórnendur Skeljungs hafi ítrekað lýst yfir að félagið eigi að draga úr vægi sölu eldsneytis í starfsemi sinni og fækka bensínstöðvum á höfuðborgarsvæðinu vegna þeirra orkuskipta sem eru að eiga sér stað.