Obama hefur verið harðlega gagnrýndur að undanförnu fyrir að ætla að halda veisluna og er ástæðan sú mikla sókn sem Deltaafbrigði kórónuveirunnar er í þessa dagana í Bandaríkjunum. Málið er svo mikið rætt að fulltrúar Hvíta hússins hafa þurft að svara spurningum um veisluna
Á fréttamannafundi í Hvíta húsinu var Jen Psaki, fjölmiðlafulltrúi Joe Biden, núverandi forseta, spurð hvort Obama væri ekki að senda frá sér slæm skilaboð um alvarleika heimsfaraldursins með því að halda svona stóra veislu. „Ég vil vísa þessu til starfsliðs Barack Obama sem getur veitt frekar upplýsingar um ráðstafanirnar í tengslum við veisluna,“ sagði Psaki og bætti við að Obama hafi verið ákafur talsmaður þess að fólk láti bólusetja sig. Þess utan verði veislan utanhúss og gestirnir fari í skimun við komuna.
Nicole Malliotakis, Repúblikani, sagði í samtali við New York Post að afmælisveislan sýni tvískinnung Demókrata. Ef það væri Donald Trump sem væri að halda slíka veilsu myndu vinstri menn slátra honum að hennar sögn.
Veislan verður haldin í glæsihöll á Martha‘s Vineyard í Massachusetts. Meðal boðsgesta verða Oprah Winfrey, Steven Spielberg og George Clooney. Obama á afmæli í dag en veislan verður haldin um komandi helgi.
Ný bylgja kórónuveirunnar hefur lagst þungt á Bandaríkin og fjöldi innlagna á sjúkrahús er sá mesti síðan síðasta sumar. Í Flórída liggja rúmlega 10.000 COVID-19 sjúklingar á sjúkrahúsum núna en um 22 milljónir búa í ríkinu. Í Louisiana hefur ríkisstjórinn ákveðið að gera kröfu á nýjan leik um notkun andlitsgríma innanhúss vegna fjölgunar COVID-19 sjúklinga. Í Arkansas hafa COVID-19 sjúklingar aldrei verið fleiri en nú á sjúkrahúsum ríkisins.
