Mörgum lesendum danska dagblaðsins B.T. brá eflaust í brún í morgun þegar þeir komu að síðu 5 í blaðinu. Þar blasti við mynd af brauðsneið með tveimur beikonsneiðum á og mynduðu þær kross, enska fánann. Að auki var tómatsósa ofan á þeim. Undir þessu stóð: „Við borðum ykkur í morgunmat.“

Um er að ræða heilsíðuauglýsingu frá breska götublaðinu The Sun í tilefni af leik Dana og Englendinga í undanúrslitum EM á Wembley í kvöld.

B.T. svaraði þessari „árás“ The Sun með heilsíðuauglýsingu í The Sun í dag. Á henni sjást vígreifir víkingar undir danska fánanum og textanum: „Hann er ekki að koma heim. Við erum að koma heim.“ Er þar vísað til lagsins „Football‘s Coming Home,“ sem var hið opinbera lag enska knattspyrnulandsliðsins 1996 þegar úrslitakeppnin fór fram þar í landi, heldur séu danskir víkingar að koma heim en eins og kunnugt er herjuðu norrænir víkingar mikið á England á öldum áður.

Allt er þetta gert í góðlátlegu gríni en hugmyndin kom frá B.T. sem spurði The Sun hvort ekki væri rétt að skiptast á heilsíðuauglýsingum í dag í tilefni af leik kvöldsins.