Sky News segir að Bezos hafi valið Funk til ferðarinnar og verður hún heiðursgestur. Funk er að vonum ánægð með þetta og segir frábært að fá loks að fara út í geim. „Ég elska þetta. Vá! Ha–ha. Ég get varla beðið,“ segir hún í myndbandi sem Bezos birti á Instagram.
„Þeir sögðu: „Þú ert stelpa, þú getur ekki gert þetta.“ Ég sagði: „Gettu hvað, það skiptir ekki máli hvað þú ert. Þú getur gert það ef þú vilt,“ og mér finnst gaman að gera hluti sem enginn hefur gert áður,“ segir hún einnig í myndbandinu.
Funk var yngsta konan í hópi 13 kvenna sem stóðust sama geimfarapróf og þeir sjö karlmenn sem tóku þátt í Mercury Seven verkefninu sem miðað að því að senda fyrstu Bandaríkjamennina út í geim á árunum 1961 til 1963.
Konunum var hins vegar meinað að fara út í geim vegna kynferðis þeirra. NASA vildi aðeins senda karlmenn út í geim á þeim tíma.
Mercury Seven verkefninu var síðan skyndilega hætt og Rússar urðu fyrstir til að senda konu út í geim en það var Valentina Tereshkova sem fór í geimferð 1963.
Geimferð Bezos og Funk mun taka um 10 mínútur. Auk þeirra verður bróðir Bezos, Mark, með í för og hæstbjóðandi í síðasta sætið en ágóðinn af uppboðinu rennur til góðgerðarmála.
