Evrópumót landsliða, EM 2020 (þrátt fyrir að vera haldið árið 2021) fer loks af stað í kvöld. Þá mætast Ítalía og Tyrkland í opnunarleik mótsins í Róm.

Eins og flestir vita er mótið haldið um alla Evrópu í þetta sinn. Það átti að fara fram í fyrra en var frestað sökum heimsfaraldurs kórónuveiru.

Eins og áður kom fram fer leikur kvöldsins fram í Róm, höfuðborg Ítalíu. Ítalska liðið leikur einmitt alla leiki sína í riðlakeppninni þar. Sviss og Wales eru í A-riðlinum með Ítölum og Tyrkjum.

Það er alltaf eftirvænting eftir stórmótum á Ítalíu. Liðið í ár er sterkt og gæti náð langt ef hlutirnir ganga upp fyrir þá.

Leikurinn hefst klukkan 19 í kvöld og verður í beinni útsendingu á Stöð 2 Sport.