Samkvæmt frétt Fótbolta.net frá því fyrr í dag hefur ítalska félagið Lecce mikinn áhuga á því að fá Brynjar Inga Bjarnason til félagsins.

Brynjar, sem er 22 ára gamall, fór á kostum með íslenska landsliðinu í fyrstu leikjum sínum fyrir liðið í landsleikjaglugganum sem lauk með leik gegn Póllandi í gær. Það var viðeigandi að hann skildi skora mark í leiknum gegn Pólverjum til að kóróna flotta viku.

Miðvörðurinn leikur með KA í Pepsi Max-deildinni. Það er nokkuð ljóst að tímaspursmál er um það hvenær hann fer út í atvinnumennsku. Í gær kom fram að lið frá Ítalíu og Rússlandi hafi boðið í Brynjar.

Lecce leikur í ítölsku Serie B en þeir féllu úr efstu deild vorið 2020. Liðið hafnaði í fjórða sæti B-deildarinnar á nýafstaðinni leiktíð.