Að minnsta kosti tvö tilboð hafa borist erlendis frá í Brynjar Inga Bjarnason, miðvörð KA. Akureyri.net greinir frá þessu í kvöld.
Tilboðin sem um ræðir koma frá Ítalíu og Rússlandi. Ekki er sagt nánar frá því hver liðin eru.
Brynjar, sem er 21 árs gamall, lék sína fyrstu landsleiki í þessari viku gegn Mexíkó, Færeyjum og Póllandi. Hann stóð sig virkilega vel og hefur nú vakið verðskuldaða athygli. Brynjar skoraði til að mynda glæsilegt mark gegn Pólverjum í dag.
Í frétt Akureyri.net kemur einnig fram að lið á Norðurlöndunum hafi spurst fyrir um hann. Engin tilboð eru komin þaðan enn.
Það er alveg ljóst að tilboðin verða fleiri, þá sérstaklega eftir frammistöðu Brynjars í leiknum í dag.