Benedikt Bóas Hinriksson blaðamaður á Fréttablaðinu telur að FH-ingar gætu hugsanlega farið að skoða breytingar á þjálfarateymi sínu, FH hefur tapað tveimur leikjum í röð í efstu deild karla.

FH tapaði fyrir nýliðum Leiknis á þriðjudag. Logi Ólafsson tók við þjálfun liðsins í vetur þegar Eiður Smári Guðjohnsen gerðist aðstoðarþjálfari landsliðsins.

Benedikt telur að forráðamenn FH gætu skoðað það að skipta Loga út innan tíðar, mikið af þjálfurum eru án vinnu í dag. Heimir Hallgrímsson er atvinnulaus, Freyr Alexandersson sömuleiðis, Ólafur Kristjánsson, Rúnar Páll Sigmundsson og Ólafur Jóhannesson.

„Algjörlega,“ sagði Benedikt í sjónvarpsþætti okkar um hvort FH-ingar gætu farið að skoða breytingar.

„Freyr er mjög álitlegur kostur. Hann var í viðtali við Fréttablaðið á dögunum, þar segist hann vilja halda áfram með Heimi. Ég veit ekki hvort hann sé til í að stökkva heim, kannski er fjölskyldan til í nokkur ár í ævintýramennsku,“ sagði Benedikt en Freyr var aðstoðarmaður Heimis í Katar.

Benedikt segir að FH sé með dýrt lið og því séu kröfurnar miklar. „FH er búið að henda nokkrum þúsundköllum í þetta lið, ég held að menn séu ekkert alltof sáttir að tapa.“

Logi Ólafsson tók við liði FH fyrir tæpu ári síðan ásamt Eiði Smára, síðasta haust ætlaði hann að stíga til hliðar en stökk inn þegar Eiður Smári lét af störfum.

Umræðuna má sjá hér að neðan.