Federico Valverde vill halda áfram hjá Real Madrid þrátt fyrir mikinn áhuga frá stærstu félögum Evrópu samkvæmt spænskum miðlum.

Úrúgvæski miðjumaðurinn, sem er 27 ára gamall, hefur verið orðaður við brottför frá spænska stórveldinu undanfarna mánuði eftir ólgu innan félagsins og breytingar sem gætu orðið á leikmannahópnum í sumar.

Samkvæmt AS hefur Valverde þó engan áhuga á að yfirgefa Santiago Bernabéu að svo stöddu og lítur enn á sig sem lykilmann hjá Real Madrid.

Manchester City og Paris Saint-Germain fylgjast þó grannt með stöðu hans og eru sögð tilbúin að gera tilraun til að fá miðjumanninn ef Real ákveður að selja hann.

Valverde hefur verið einn mikilvægasti leikmaður Real Madrid undanfarin ár og er þekktur fyrir fjölhæfni sína, vinnslu og mikla orku á miðsvæðinu.

Real Madrid hefur ekki gefið nein merki um að félagið vilji selja leikmanninn en áhugi frá stærstu liðum Evrópu heldur áfram að aukast fyrir sumargluggann.