Manchester United hefur hafið formlegar viðræður við Michael Carrick um að taka við liðinu til frambúðar samkvæmt enskum miðlum. Félagið er sagt hafa lagt fram tilboð um tveggja ára samning með möguleika á framlengingu til ársins 2029.

Carrick hefur stýrt liðinu tímabundið eftir brotthvarf Ruben Amorim og virðist nú vera orðinn helsti kostur stjórnenda félagsins til framtíðar. Samkvæmt fréttum samþykkti Sir Jim Ratcliffe, einn eigenda United, að hefja samningaviðræður eftir fund framkvæmdastjórnar félagsins fyrr í vikunni.

Omar Berrada framkvæmdastjóri og Jason Wilcox yfirmaður knattspyrnumála eru sagðir hafa mælt eindregið með því að Carrick fái starfið til lengri tíma.

Vonast er til að niðurstaða geti fengist fyrir síðasta heimaleik tímabilsins gegn Nottingham Forest á sunnudag svo stuðningsmenn fái skýr svör um hver muni stjórna liðinu á næsta tímabili.

Þjálfarateymi Carrick er einnig talið líklegt til að halda áfram störfum. Steve Holland, Jonathan Woodgate og Jonny Evans gætu allir skrifað undir nýja samninga, auk markmannsþjálfarans Craig Mawson.

Manchester United hyggst jafnframt styrkja þjálfarateymið enn frekar í sumar og er sérstaklega leitað að sérfræðingi í föstum leikatriðum. Andreas Georgson, sem starfaði áður hjá félaginu, hefur verið nefndur sem möguleg viðbót.

Carrick var sjálfur viðstaddur úrslitaleik FA Youth Cup á fimmtudag ásamt stjórnendum félagsins þar sem U18 ára lið United tapaði 2-1 fyrir Manchester City.