Seamus Coleman hefur ákveðið að leggja skóna á hilluna eftir glæsilegan feril hjá Everton sem spannar meira en sautján ár.
Írski bakvörðurinn kom til Everton frá Sligo Rovers árið 2009 fyrir aðeins 60 þúsund pund og varð síðar einn ástsælasti leikmaður félagsins. Coleman lék alls 372 leiki í ensku úrvalsdeildinni fyrir Everton, þar af 140 sem fyrirliði liðsins.
Ef hann kemur við sögu í síðasta heimaleik sínum gegn Sunderland um helgina verður það 434. leikur hans fyrir félagið í öllum keppnum. Þá fer hann upp í tíunda sæti yfir leikjahæstu menn í sögu Everton.
Coleman staðfesti ákvörðun sína í viðtali á heimasíðu félagsins og sagði að nú tæki við tími til að hugsa um framtíðina með fjölskyldu sinni.
Hann útilokaði þó ekki að halda áfram störfum hjá Everton utan vallar.
„Félagið hefur verið frábært við mig og boðið mér tækifæri til að vera áfram hjá Everton,“ sagði Coleman.
Hinn 37 ára gamli Íri skilur eftir sig stór spor hjá Everton eftir langan og farsælan feril á Merseyside.
