„Það eru allir að stríða Óskari Hrafni vini mínum, setja hann í fyrsta sæti. Setja alla presuna á hann,“ sagði Hjörvar Hafliðason í hlaðvarpsþættinum Dr. Football í dag og átti þar við um að Breiðablik var spáð sigri í efstu deild karla.
Fyrirliðar, þjálfarar og forráðamenn settu fram spá sína í gær, þar er Blikum í fyrsta sinn í sögunni spáð sigri í efstu deild. Breiðablik hefur einu sinni í sögunni orðið Íslandsmeistari, það var árið 2010.
„Ég held að í fyrsta lagi sé það út af því að ekkert lið hefur náð í betri úrslit en Breiðablik í vetur, Óskar á öðru ári með þetta lið. Ætti að vera kominn með það lengra en á síðustu leiktíð, ég er ekki viss um að allir séu að stríða Óskari. Það eru margir sem telja að Breiðablik verði Íslandsmeistari,“ sagði Guðmundur Benediktsson sem var gestur í þætti Hjörvars.
„Blikar verða í þessari baráttu, ég er viss um það,“ sagði Gummi Ben um sumarið en efsta deild karla fer af stað í dag.
Hjörvar telur að fólki hafi gaman af því að setja mikla pressu á Óskar Hrafn. „Ég held að menn hafi gaman af því að fleygja pressu á Óskar.“
Kristján Óli Sigurðsson telur að Blikar verði í baráttu um þann stóra. „Mér finnst þeir vera með bestu breiddina, tvo menn í hverri einustu stöðu. Það tók Óskar smá tíma að koma þessu í stand, með tvær markavélar sem eiga að skora tíu mörk.“
Breiðablik mætir KR í fyrstu umferð en leikurinn fer fram á sunnudag á Kópavogsvelli.