Síðustu sex mánuði hafa fleiri dauðsföll verið í Rio de Janeiro í Brasilíu en fæðingar. Ástæðan er heimsfaraldur kórónuveirunnar en veiran leikur nær algjörlega lausum hala í Brasilíu. Rio de Janeiro er næstfjölmennasta borg landsins. Þar voru skráð 36.437 andlát í mars en fæðingar voru 32.060, munurinn er 16%. Í að minnsta kosti 10 öðrum borgum, með meira en hálfa milljón íbúa, voru andlát fleiri en fæðingar í mars.

CNN skýrir frá þessu. Fram kemur að mikil aukning hafi orðið í smitum af völdum kórónuveirunnar í Brasilíu að undanförnu og þar eigi sérstaklega smitandi afbrigði veirunnar hlut að máli auk takmarkaðra sóttvarnaaðgerða.

Samkvæmt tölum frá Johns Hopkins háskólanum létst 77.515 af völdum COVID-19 í mars og rúmlega tvær milljónir smita voru staðfest. Í 24 af 27 ríkjum og alríkissvæðum landsins eru að minnsta kosti 80% af gjörgæslurýmum í notkun.

Það hefur gengið hægt að bólusetja landsmenn, bæði vegna pólitískra deilna en einnig vegna erfiðleika við öflun bóluefna. 6,3 milljónir landsmanna hafa lokið bólusetningu en það eru um 3% þjóðarinnar. 21,1 milljón hefur fengið að minnsta kosti einn skammt af bóluefni.