Fyrrum enski framherjinn Chris Sutton hefur kallað eftir breytingum á viðbrögðum varðandi höfuðáverka knattspyrnumanna. Hann telur að tímabundnar skiptingar gætu gefið læknum meiri tíma til að meta áverka.

„Ég hef séð ýmis tilvik þar sem leikmenn fá höfuðáverka og eru ekki teknir af velli. Það þarf að skoða leikmanninn vel, það er skynsamlegast að taka leikmanninn af velli og fá óháðan lækni til þess að skoða leikmanninn í rólegheitum. Það hjálpar ekki leikmanni að vera alveg skipt út af heldur ætti að leyfa tímabundnar skiptingar,“ sagði Sutton við BBC.

„Það eru til fyrirbyggjandi aðgerðir sem geta hjálpað hinum nútíma leikmanni og næstu kynslóðum.“

Rannsóknir hafa sýnt að atvinnumenn í knattspyrnu séu rúmlega 3,5 sinnum líklegri til að þróa með sér heilabilun en aðrir. Faðir Chris Sutton, sem einnig var knattspyrnumaður lést úr heilabilun í fyrra og hafði það mikil áhrif á fjölskylduna.

„Yngsti sonur minn vill ekki lengur spila fótbolta eftir það sem gerðist fyrir afa hans.“

„Það er ljóst að við verðum að finna lausnir svo að færri endi með heilabilun. Ég trúi því að faðir hafi dáið vegna þess að hann skallaði fótbolta.“

Alan Shearer kallaði eftir svipuðum aðgerðum eftir að tveir leikmenn Sheffield United hlutu höfuðáverka síðastliðinn sunnudag.

Í febrúar kynnti enska úrvalsdeildin að nú væri eins konar reynslutímabil þar sem öll lið fá tvær skiptingar ef leikmaður liðs fær heilahristing til að sporna gegn því að leikmenn haldi leik áfram eftir höfuðáverka. Þá eru einnig nýjar reglur í Englandi, Skotlandi og Norður-Írlandi þar sem börnum undir 11 ára aldri verði ekki lengur kennt að skalla fótbolta.