Frá því í mars á síðasta ári hafa þingmenn ekki farið í neinar utanlandsferðir vegna heimsfaraldurs kórónuveirunnar. Með þessu hafa rúmlega 40 milljónir króna sparast. Óvíst er hvenær þingmenn og starfsmenn þingsins geta byrjað að ferðast til útlanda á nýjan leik.

Morgunblaðið skýrir frá þessu í dag.  Haft er eftir Rögnu Árnadóttur, skrifstofustjóra Alþingis, að alþjóðasamstarf þjóðþinga fari nú allt fram í gegnum fjarfundabúnað og ekki sé vitað hvenær staðfundir alþjóðlegra þingmannasamtaka hefjist að nýju. Þróun heimsfaraldursins, framgangur bólusetninga og fleira ráði því.

Í mars á síðasta ári ákvað forsætisnefnd þingsins að fella niður vinnutengdar ferðir þingmanna og starfsfólks frá og með 17. mars út vorþingið. Ferðum á þingmannafundi og ráðstefnur var í raun sjálfhætt því allt færðist þetta yfir á rafrænt form að frumkvæði skipuleggjenda.

Morgunblaðið segir að samkvæmt upplýsingum frá Rögnu hafi ferðakostnaður, ferðir og dagpeningar, þingmanna 2020 verið tæplega 10,7 milljónir en 2019 var hann tæplega 51,9 milljónir.