Þórólfur Guðnason sóttvarnalæknir tilkynnti á upplýsingafundi Almannavarna í dag að bólusetning með bóluefninu Astra Zeneca hafi verið stöðvuð hér á landi tímabundið. Fréttir hafa borist þess efnis að Danir hafi hætt að nota efnið vegna tilfella blóðtappa. Eitt dauðsfall í Danmörku hefur orðið hjá sjúklingi með blóðtappa sem hafði verið bólusettur með efninu. Annað slíkt tilfelli hefur komið upp í Austurríki.

Þórólfur greindi frá því að samkvæmt upplýsingum frá Lyfjastofnun Evrópu sé ekkert sem bendi til að um orsakasamhengi sé að ræða á milli bólusetninganna og blóðtappatilfellanna. Beðið er frekari upplýsinga sem berast síðar í dag en ákveðið hefur verið að stöðva hér tímabundið notkun Astra Zeneca. Ekki hafa fengist upplýsingar um alvarlegar aukaverkanir hjá fólki sem bólusett hefur verið með þessu efni hér á landi og hefur sú bólusetning gengið vel.

Einn greindist með Covid-19 innanlands í gær og enginn á landamærlum. Sá sem greindist var útsettur fyrir smiti en var greindur neikvæður fyrir nokkrum dögum.

Fimm afleidd smit hafa greinst út frá smiti af breska afbrigðinu sem greindist um síðustu helgi. Fjölmargir eru í sóttkví vegna þeirra smita, eða 100 til 200. 1.300 sýni voru tekin í gær sem er óvenjumikið enda hefur mikið verið skimað í tengslum við ferðir mannsins sem greindist um helgina, t.d. meðal gesta á stórum tónleikum í Hörpu á föstudagskvöld.

Þórólfur segir að það líti út fyrir að tekist hafi að ná utan um hópsýkinguna en það skýrist þó betur næstu daga, það geti tekið allt að viku að greinast með smit eftir að það hefur orðið. Ef fer svo fram sem horfir mun ekki verða þörf á frekari herðingum varðandi samkomutakmarkanir en ný reglugerð á að taka gildi 18. mars. Þórólfur er að smíða tillögur að áframhaldandi sóttvarnareglum. Hann segir ekki líklegt að frekari tilslakanir verði lagðar til í bili.