Starfsmaður á Landspítalanum greindist með Covid-19 í gær. Vísir.is greinir frá þessu.
Var hópur starfsmanna og sjúklinga sendur í sýnatöku vegna þessara tíðinda. Deild þar sem smitið kom upp hefur verið lokað.
Anna Sigrún Baldursdóttir, aðstoðarmaður forstjóra Landspítalans, segir að smitrakning standi yfir og búast megi við niðurstöðum úr sýnatöku síðar í dag.
Anna segir jafnframt að viðkomandi starfsmaður hafi ekki verið að koma frá útlöndum og þetta sýni að veiran sé úti í samfélaginu.
Þetta er fyrsta innanlandsmit af Covid-19 sem greinist síðan 26. febrúar.
Í stuttu samtali við DV sagðist Anna ekki vita hvort mótefnamælingu á starfsmanninum væri lokið. „Þetta er allt að gerast núna,“ sagði hún. Betri upplýsingar um málið munu því liggja fyrir síðar í dag.
Uppfært kl. 14:50
Samkvæmt frétt RÚV er deildin sem smitaði starfsmaðurinn vinnur á göngudeild smitsjúkdóma, ofnæmis og lungnasjúkdóma. Um 50 manns eru hugsanlega útsett fyrir smiti og hafa verið send í sóttkví og sýnatöku. Að sögn Más Kristjánssonar, yfirlæknis smitsjúkdómadeildar, er ekki vitað til þess enn að neinn hafi smitast af starfsmanninum.
Fréttablaðið hefur eftir Má Kristjánssyni, yfirlækni smitsjúkdómadeildar Landspítalans, að ólíklegt sé að smit starfsmannsins sé gamalt. Það gæti verið tengt ákveðnu landamærasmiti, sem vitað er af.
„Viðkomandi starfsmaður var hafði fundið fyrir vægum einkennum og fór í próf á sunnudaginn fyrir viku en fékk neikvætt úr því. Hann mætti svo í vinnu þriðjudag, miðvikudag og fimmtudag. Síðan breytast einkennin á föstudaginn var og hann fer aftur í próf á laugardagsmorguninn, sem reyndist síðan vera jákvætt,“ segir Már.
Már segir nánast útilokað að smitið sé gamalt: „Þegar þú ert með svona niðurstöður eins og viðkomandi starfsmaður, sem sýna að veirumagnið er mikið, hann var með einkennin og svo erum við líka með það sem við köllum faraldsfræðilegt samhengi, þá er enginn í vafa um að þetta er nýtt smit.“
Til öryggis verður starfsmaðurinn settur í mótefnamælingu.
