Vegna þeirrar ógnar sem er talin stafa af stökkbreyttu afbrigði kórónuveirunnar, hinu svokallaða B117 afbrigði, hafa þýsk yfirvöld ákveðið að framlengja núverandi sóttvarnaaðgerðir og herða þær. Gildir þetta fram í miðjan febrúar, að minnsta kosti.

Angela Merkel, kanslari, tilkynnti þetta í gærkvöldi eftir að hún hafði fundað með leiðtogum sambandsríkjanna. Hún sagði að B117 afbrigðið ógni þeim aðgerðum og árangri sem hefur náðst í að halda aftur af faraldrinum. Afbrigðið hefur greinst í landinu en er ekki enn allsráðandi. „Við verðum að grípa til aðgerða núna og grípa til fyrirbyggjandi aðgerða gegn ógninni sem stafar frá þessari veiru,“ sagði Merkel sem sagði einnig að vísbendingar væru um að þetta afbrigði breiðist hraðar út meðal barna en fullorðinna.

Í sóttvarnaraðgerðunum fellst meðal annars að skólar verða lokaðir til 14. febrúar. Þeir sem geta unnið heima eiga að gera það til 15. mars. Þá verða reglurnar um notkun andlitsgríma hertar bæði í verslunum og almenningssamgöngufarartækjum.

Greindum smitum hefur fækkað aðeins í landinu að undanförnu sem og innlögnum á gjörgæsludeildir en sérfræðingar vara við því að B117 geti orðið til þess að smitum og innlögnum fjölgi á nýjan leik. B117 uppgötvaðist fyrst í Englandi í september, það er talið allt að 70% meira smitandi en hefðbundin afbrigði veirunnar.