Örpistill
Athygli vekur að þrír helstu valdamenn landsins er kemur að samgöngumálum eru allir dýralæknar. Þetta rann upp fyrir mörgum þegar Davíð Þorláksson (sem er ekki dýralæknir) var ráðinn framkvæmdastjóri Betri samgangna ohf. Árni Mathiesen, fyrrverandi fjármálaráðherra, er stjórnarformaður félagsins. Um er að ræða opinbert hlutafélag sem hefur það hlutverk að hrinda í framkvæmd uppbyggingu samgönguinnviða í samræmi við samgöngusáttmála höfuðborgarsvæðisins sem fól í sér sameiginlega framtíðarsýn og fjárfestingar í samgönguframkvæmdum til fimmtán ára, líkt og sagði í tilkynningu frá Stjórnarráði í kjölfar stofnunar fyrirtækisins. Ríkið og sveitarfélögin á höfuðborgarsvæðinu stofnuðu þetta fyrirtæki saman.
Semsagt, Árni Mathiesen, fyrrverandi dýralæknir og fyrrverandi fjármálaráðherra, er stjórnarformaður Betri samgangna ohf.
Forstjóri Vegagerðarinnar, Bergþóra Þorkelsdóttir, er ennfremur dýralæknir en hefur sinnt stjórnunarstörfum undanfarna tvo áratugi.
Samgönguráðherra og formaður Framsóknarflokksins, Sigurður Ingi Jóhannsson, er einnig dýralæknir að mennt.
Ég ætla að láta liggja á milli hluta hvort að þetta beri vitni um fjölhæfni dýralæknastéttarinnar eða einhvers konar fúsk í mannaráðningum í opinberum fyrirtækjum. Eru þetta tilviljanir? Hvað segir Dýralæknafélag Íslands?
