„Aðgengi að bóluefni og bólusetning þjóðarinnar er stærsta og mikilvægasta verkefni stjórnvalda í upphafi kosningaárs. Efnahagsleg velferð er í húfi og þar með geta okkar til að standa undir góðum lífskjörum og öflugu velferðarsamfélagi til framtíðar,“ segir Óli Björn Kárason, alþingismaður Sjálfstæðisflokksins, í grein í Morgunblaðinu í dag þar sem hann fer yfir efnahagshorfur í upphafi árs.
Í grein sinni segir Óli Björn ennfremur að samfélagið hafi ekki endalaust úthald til að verja fyrirtæki, heimili og velferðarkerfið með þeim hætti sem gert hefur verið síðustu mánuði. Miðað við útgjöld ríkissjóðs undanfarið kosti hver dagur með lömuðu efnahagslífi og baráttu við kórónuveiruna einn milljarð. Efnahagslífið velti á því að hjarðónæmi verði náð með bólusetningu hið fyrsta.
Í frétt Morgunblaðsins kemur hins vegar fram að miðað þær upplýsingar um afhendingaráætlun bóluefnis sem fyrir liggur verði aðeins búið að bólusetja 8,1% þjóðarinnar í lok fyrsta ársfjórðungs. Heilbrigðisráðuneytið vonast til að afhending bóluefnis verði örari er á líður en treystir sér ekki til að greina frá frekari afhendingu.
Jóhannes Þór Skúlason, framkvæmdastjóri Samtaka ferðaþjónustunnar, segir að dregið hafi úr bjartsýni á að ferðaþjónustan rétti út kútnum fyrir næsta sumar vegna útbreiðslu kórónuveirunnar á lykilmörkuðum og hægagangs í bólusetningu hér á landi.
