Næstum fjórði hver jarðarbúi gæti þurft að bíða allt til 2022 eftir fá bólusetningu gegn kórónuveirunni sem veldur COVID-19. Ástæðan er að ríku löndin, þar sem tæplega 15% mannkyns býr, hafa tryggt sér 51% af þeim skömmtum sem eru í boði af bóluefnum sem þykja lofa bestum árangri.

Þetta þýðir að lágtekju og millitekjulönd, þar sem rúmlega 85% mannkyns býr, verða að skipta afganginum sín á milli.

Vísindamenn við Johns Hopkins Bloomberg School of Public Health í Baltimore skýrðu frá þessu á þriðjudaginn. Þeir segja að til að hægt sé að takast á við faraldurinn á áhrifaríkan hátt verði ríku löndin „að taka þátt í réttlátri skiptinu bóluefna gegn COVID-19 um allan heim“.

Vísindamennirnir segja einnig að óvissan um aðgengi allra að bóluefnum tengist ekki bara því að enn standi klínískar tilraunir yfir heldur einnig því að ríkisstjórnir og lyfjaframleiðendur hafa ekki gætt nægilega vel að gegnsæi og ábyrgð við gerð samninga um kaup og sölu á bóluefnum.

15. nóvember höfðu ríku löndin pantað tæplega 7,5 milljarða skammta af bóluefnum gegn COVID-19 frá 13 framleiðendum. Meðal þessara landa eru Japan, Ástralía og Kanada sem hafa samtals pantað einn milljarð skammta.

Vísindamennirnir segja að jafnvel þótt lyfjaframleiðendurnir geti starfað á fullum afköstum verði fjórðungur mannkyns að bíða í eitt ár eða lengur eftir að fá bólusetningu.