Samkvæmt frétt Zim Morning Post fundust gullstangirnar í handfarangri Rushwaya. Þær vega um sex kíló. Verðmæti þeirra er talið vera sem nemur á um fimmta tug milljóna íslenskra króna en það þykir yfirvöldum í Simbabve benda til að hún hafi ekki verið ein að verki. Steven Tserayi, starfsmaður forsetans til margra ára, var að sögn einnig handtekinn á flugvellinum en síðan sleppt. Forsetinn hefur nú rekið hann úr starfi.
Málið var tekið fyrir dóm í síðustu viku. Þá sagði Rushwaya að hún hafi aðeins tekið að sér að flytja gullið fyrir viðurkenndan gullsala að nafni Ali Japan frá höfuðborginni Harare til Dubai. En það kom fram fyrir dómi að ekki hafði verið gengið frá nauðsynlegum pappírum vegna þessa og því var hún úrskurðuð í áframhaldandi gæsluvarðhald. Rushwaya var áður formaður knattspyrnusambands landsins, Zifa, en varð að láta af því embætti vegna vegna veðmálahneykslis þar sem samið var fyrirfram um úrslit leikja.
Bæði Rushwaya og Tserayi tilheyra elítunni í landinu og þetta er ekki í fyrsta sinn sem fólk úr henni tengist smygli á gulli þar í landi. Grace Mugabe, ekkja Robert Mugabe fyrrum forseta, og Joyce Mujuru, varaforseti hans, hafa báðar verið orðaðar við smygl á gulli og demöntum fyrir tugi milljóna að sögn The Times. Núverandi forseti, Emmerson Mnangagwa, var sakaður um að hafa tekið við peningum frá ólöglegum gullnámurekstri árið 2003 þegar hann var forseti þingsins.
