Logi Einarsson, formaður Samfylkingarinnar, lýsir yfir þungum áhyggjum af stöðu veitingahúsa eftir nýjustu herðingar á samkomubanni. Logi kemst hnyttilega að orði um málið á Facebook:
„Það að leyfa veitingastöðum að halda opnu en takmarka gesti við 10 manns er svipað og ef prestar mættu gefa fólk saman ef þeir takmörkuðu brúðhjónin við einn.
Þó aðgerðirnar séu án efa nauðsynlegar munu fáir ef einhver veitingastaður geta haft opið við þessi skilyrði. Og þetta gildir um ýmsa fleiri starfsemi. Slík fyrirtæki eiga hins vegar ekki rétt á lokunarstyrkjum, af því þau þurfa ekki að loka.
Ríkisstjórnin verður að kynna úrræði fyrir fyrirtæki í slíkri stöðu sem allra allra fyrst.“
Þær raddir hafa heyrst úr ranni veitingamanna að betra væri að loka veitingastöðum í stuttan tíma en að þeir starfi áfram við þessi skilyrði, að geta aðeins tekið á móti tíu matargestum. Eins og kemur fram í pistli Loga telur hann að fáir veitingastaðir geti haft opið við þessi skilyrði.
Ólafur Örn Ólafsson, sem rekur Vínstúkuna Tíu sopar, segir t.d. á Facebook:
„Það væri betra að loka veitingastöðum bara í staðinn fyrir að leyfa þeim að hafa opið fyrir 10 manns, kannski 8 gesti og tvo starfsmenn. Það þarf ekkert meistarapróf í viðskiptafræði til að sjá að það bisnessmódel gengur aldrei upp.“
https://www.facebook.com/logi.einarsson/posts/10221393111610979
