Sigurður Héðinn er landsþekktur leiðsögumaður veiðimanna og ekki síður þekktur sem höfundur Haugsins, hinnar gjöfulu veiðiflugu. Og nú má segja að hann sé að verða þekktur sem höfundur bóka um laxveiði.

Í fyrra kom bókin Af flugum, löxum og mönnum frá honum, sem gerði það mjög gott í jólabókaflóðinu. Nú berast þær fréttir að hann sé kominn með nýja bók. Þetta er eins og metsöluhöfundarnir, það er ein bók á ári frá kallinum. Nýja bókin heitir Sá stóri, sá missti og sá landaði og þegar hún er skoðuð er ljóst að hér er á ferðinni engu síðri bók en hann gerði í fyrra.

Sigurður fer yfir veiðitækni, sérstaklega skoðar hann hegðun stórlaxins, lífið við bakkann og svo er að sjálfsögðu einkar glæsilegur flugukafli í bókinni. Auk þess eru stórskemmtilegar veiðisögur um alla bók. Það verður að segjast eins og er að hér er á ferðinni algerlega frábær bók frá Sigga og full ástæða til að óska honum til hamingju með bókina.

Sól Hilmarsdóttir (dóttir Hilmars Hanssonar stórveiðimanns) skreytir svo bókina með einkar fallegum teikningum. Þessi bók fær fullt hús, fimm stjörnur, fyrir að vera akkúrat það sem laxveiðifólk vill sjá í veiðibókum! Bókin er í prentun og kemur í verslanir í nóvember.