Tilnefning Donalds Trumps Bandaríkjaforseta á Amy Coney Barrett í hæstaréttarstól sem losnaði við andlát Ruth Bader Ginsburg hefur verið afgreitt úr réttarfarsnefnd bandarísku öldungadeildarinnar. Málið verður nú tekið til umfjöllunar í öldungadeildinni í heild sinni.

Ætlanir Demókrata um að hindra, eða hið minnsta tefja, afgreiðslu tilnefningarinnar fram yfir kosningarnar 3. nóvember verða því líklega að engu.

Repúblikanar eiga 53 sæti af 100 í öldungadeildinni og því leiðin greið að öruggri staðfestingu Barrett héðan af. Mestu líkurnar voru á að Demókrötum tækist að tefja afgreiðsluna í réttarfarsnefndinni, en eins og fyrr sagði, afgreiddi nefndin tillöguna frá sér í morgun að bandarískum tíma. Demókratar voru fjarverandi við atkvæðagreiðslu nefndarinnar.

Reiknað er með að öldungadeildin í heild sinni greiði atkvæði um tilnefninguna strax á mánudaginn, aðeins átta dögum fyrir kosningarnar.

Skjálfti er hlaupinn í Repúblikana vegna skoðanakannanna, en allar líkur eru á að þeir missi tökin á Hvíta húsinu, engar líkur eru á að þeir nái tökum á fulltrúadeildinni og miklar líkur á að þeir missi öldungadeildina. Því gæti farið svo að báðar deildir þingsins og Hvíta húsið yrði í höndum Demókrata. Það er því mikið undir hjá íhaldshreyfingunni að koma fulltrúa íhaldsafla fyrir í Hæstarétti fyrir kosningarnar.