Margir kannast eflaust við hversu erfitt það getur verið að tala latan heilann á að nú sé kominn tími til að fara út að skokka eða í ræktina. En þegar maður kemst svo loksins af stað og fer að taka á því er eins og heilinn hafi tekið breytingum. Skyndilega er skapið betra og líðanin er að vissu leyti eins og að vera í vímu.

Ástæðan er að þegar við hreyfum okkur þá losar líkaminn um endorfín en það er efni, sem líkist morfíni að vissu leyti, og myndast meðal annars í taugafrumum í heilanum. Efnið er aðallega ætlað til að losna úr læðingi þegar hættu steðjar að höndum því það heldur aftur af sársaukatilfinningunni og eins og önnur efni, sem líkjast morfíni, þá getur það valdið því að fólki finnst það vera í vímu.

En endorfínsælan er ekki það eina sem gerist þegar við hreyfum okkur. Í umfjöllun Danska ríkisútvarpsins um málið kemur fram að við hreyfingu myndist efni sem séu mjög mikilvæg fyrir heilafrumurnar og það sé góð leið til að auka framleiðslu þeirra að hreyfa sig.