Auðunn Blöndal gæti ekki verið stoltari af vini sínum, fjölmiðlamanninum Ríkharð Óskar Guðnasyni, sem alla jafna er kallaður Rikki G.

Eins og Auðunn segir frá á Facebook er Rikki búinn að léttast um 12,5 kíló af þremur mánuðum og missa umtalsverða líkamsfitu. En hvernig fór Rikki að þessu? Það getur verið gott að eiga góða vini sem sýna manni stuðning, eins og Auðunn bendir á.

„Ég minnti hann á hverju kvöldi hvað hann yrði sáttur 15 des þegar að hann væri búinn að ná þessu og við færum út að borða og fagna, sýnist hann vera nokkuð sáttur!,“ segir Auðunn sem birti mynd af þeim félögum sem tekin var á föstudagskvöldið.

Auðunn bendir á að verðlaunin, fyrir utan betri heilsu og útlit, hafi verið „all inn“ á veitingastað að vali Rikka G. Fjölmargir hrósa Rikka fyrir árangurinn á Facebook-síðu Auðuns. Á meðal þeirra er skemmtikrafturinn og útvarpsmaðurinn Sóli Hólm sem segir:

„Held að margir piparsveinar þakki fyrir það að Rikki sé ekki á markaðnum. One handsome diablo!“ Þá hrósar Ívar Guðmundsson, útvarpsmaður og líkamsræktarfrömuður, árangri Rikka. „Bara frábær árangur. Til hamingju.“