Fjölmiðlamaðurinn Auðunn Blöndal hélt upp á fertugsafmælið á dögunum með heljarinnar veislu í Hörpu. Auðunn er í sambúð með fyrirsætunni Rakel Þormarsdóttur og í lok síðasta árs eignuðust þau soninn Theódór Sverri Blöndal. Við ákváðum að skoða hvernig parið á saman ef litið er til stjörnumerkjanna.

Auðunn er Krabbi en Rakel er Vog. Krabbinn og Vogin eru bæði miklar tilfinningaverur og ná að tengjast vel á því sviði. Einna helst þurfa þau á betri jarðtengingu að halda. Vogin er djörf og rómantísk, nýtur þess að fara á listsýningar og vera meðal fólks. Krabbinn er hins vegar heimakær, leggur áherslu á fjölskyldulífið og almennan stöðugleika heima við.

Krabbinn á það til að verða tortrygginn að óþörfu og þannig er hann líka auðsærður. Galsafull Vogin gæti því auðveldlega sært Krabbann með útstáelsi sínu ef ekki er varlega farið. Mikilvægt er að Krabbi og Vog tali vel saman til að fyrirbyggja misskilning. Vogin er vís til að halda ástarlífinu alltaf spennandi.