Kanadíski rokkarinn Neil Young er allt annað en sáttur við að Donald Trump leiki tónlist hans á kosningafundum sínum. Það er í raun eitt og annað sem bendir til að Trump sé mikill aðdáandi Young en á hinn bóginn er fátt sem bendir til að Young sé mikill aðdáandi Trump.

Á föstudaginn stóð Trump fyrir samkomu til að fagna því að 244 ár voru liðin frá því að Bandaríkin fengu sjálfstæði frá Bretlandi voru þrjú af lögum Young leikin og það reitti hann til reiði. Huffington Post skýrir frá þessu.

Í athugasemd við myndband á Twitter, þar sem sýnt var frá samkomunni, gerði Young það ljóst að hann er ekki sáttur við að Trump noti tónlist hans í tengslum við fundahöld sín.

Þetta er ekki í fyrsta sinn sem Young lýsir andstöðu við notkun Trump á tónlist sinni. Young fékk bandarískan ríkisborgararétt í janúar og við það tilefni birti hann bréf til Trump á heimasíðu sinni. Í bréfinu lét hann Trump hafa það óþvegið og sagði hann „smánarblett“ á Bandaríkjunum. Einnig kom skýrt fram að hann vilji ekki að Trump noti tónlist hans á fundum sínum.

Auk Young hafa listamenn og hljómsveitir á borð við The Rolling Stones, Elton John, Adele, Village People og R.E.M. krafist þess að Trump hætti að nota tónlist þeirra á kosningafundum sínum.