Áhorf spjallþáttarins The Ellen DeGeneres Show eru í frjálsu falli þessa dagana í kjölfar neikvæðrar umræðu um þáttastjórnandann. Grínistinn Ellen DeGeneres hefur stjórnað þættinum í 17 ár við miklar vinsældir en þrálát umræða um ónotalegheit hennar við gesti sína og starfsfólk hefur sett strik í reikninginn.
Þetta hófst allt þegar YouTube-stjarnan NikkieTutorials var gestur hjá Ellen en hún bar henni ákaflega illa söguna og sagði hana kalda og fjarlæga. Síðan þá hafa fleiri deilt sögum um Ellen, þar á meðal lífvörðurinn Tom Majercak, sem vann með henni á Óskarnum 2014 og kallaði hana kalda og lítilmannlega. Fleiri hafa stigið fram, þar á meðal starfsfólk þáttanna, sem segja hana leggja einhvern einn starfsmann fyrir á degi hverjum og nýju starfsfólki sé ráðlagt að „láta sig hafa það því að á morgun verði það einhver annar.“
Ellen sem er 62 ára hefur verið gift leikkonunni Portia DeRossi frá 2008 en hún er einna þekktust fyrir leik sinn í gamanþáttunum Arrested Development. Það þarf ekki að eyða orðum í að útskýra frægð Ellen DeGeneres en hún skartar líklega dýrustu sjálfu/selfie heims sem hún tók ásamt stóði af frægustu leikurum heims á Óskarsverðlaunahátíðinni 2014.
