Um páskana var norska lögreglan með mikið eftirlit við sænsku landamærin og segja laganna verðir að niðurstaðan af þessu eftirliti hafi verið mikil vonbrigði. 2.350 Norðmenn voru stöðvaðir af lögreglunni fyrir að hafa ekki farið eftir fyrirmælum norskra yfirvalda um að fara ekki til Svíþjóðar vegna COVID-19 faraldursins. Allir hafa þessir Norðmenn nú verið settir í sóttkví.

Samkvæmt ákvörðun norsku ríkisstjórnarinnar má aðeins fara úr landi ef brýna nauðsyn ber til og það átti ekki við í tilfelli þessara Norðmanna því þeir fóru yfir til Svíþjóðar til að versla sem telst ekki beint nauðsynlegt þótt verðlag sé töluvert lægra í Svíþjóð.

Norska lögreglan hefur ekki tekið upp fast eftirlit við allar landamærastöðvar en þeir sem voru nappaðir fóru yfir landamærin á stöðum þar sem lögreglan er með fasta viðveru.

Talsmaður lögreglunnar sagði í samtali við Norska ríkisútvarpið að margir hafi afsakað sig með að „ég ætlaði bara . . .“.