Samkvæmt frétt The Guardian segja hjálparsamtökin Food Foundation að sífellt fleiri landsmenn fái ekki nóg að borða og að 1,5 milljónir hafi þurft að fara í gegnum að minnsta kosti heilan dag án þess að fá nokkuð að borða. Ástæðurnar eru annaðhvort að þeir hafa ekki efni á mat eða aðgang að mat.
Samtökin segja að þrjár milljónir manna búi á heimilum þar sem einhver hefur þurft að sleppa máltíðum. Rúmlega ein milljón manna hefur skýrt frá því að faraldurinn hafi haft þau áhrif að engar tekjur sé lengur að hafa. Þriðjungur þeirra á ekki rétt á aðstoð frá hinu opinbera. Tölurnar byggjast á könnun sem YouGov gerði fyrir Food Foundation í Englandi, Skotlandi og Wales í síðustu viku.
Anna Taylor, framkvæmdastjóri samtakanna, segir að þessi vandi sé of mikill til að hjálparsamtök, sem reka mataraðstoð, og sveitarfélög geti tekist á við hann ein. Það þurfi að koma til aðstoð frá ríkisstjórninni sem verði að senda fjölskyldum, sem ekki hafa efni á mat, beinharða peninga.
Það sama segja forsvarsmenn annarra hjálparsamtaka sem reka mataraðstoð. Sabine Goodwin, hjá Independent Food Aid Network, sagðist óttast að viðbrögð ríkisstjórnarinnar séu of hæg og að ástandið muni „fara úr böndunum“. Hún sagði að allt að 300 prósent fleiri leiti nú aðstoðar hjá hjálparsamtökum til að fá mat og eigi þau fullt í fangi með að geta boðið upp á nægan mat handa öllum.
