Jack Dorsey, forstjóri og stofnandi Twitter, ætlar að gefa einn milljarð dollara til góðgerðarmála vegna COVID-19 faraldursins. Peningana á að nota í menntun stúlkna og til heilbrigðismála og til að tryggja fólki lágmarksframfærslueyri.

Gjöfin er í formi hlutabréfa í fyrirtæki hans, Square, og á að nota hana til mildandi áhrifa þegar faraldurinn er afstaðinn. Dorsey tilkynnti þetta á Twitter.

Upphæðin svarar til 28 prósenta af núverandi auði hans sem nemur 3,6 milljörðum dollara.

Dorsey segir að hann vilji gjarnan styðja við aðgerðir sem beinast að menntun og heilbrigði stúlkna auk hugmynda hans um að öllum sé tryggður lágmarksframfærslueyrir.

„Þetta er frábær hugmynd sem við verðum að prófa. Heilbrigði stúlkna og menntun er lykillinn að jöfnuði. Af hverju núna? Af því að þörfin er meiri og meira aðkallandi og ég vil sjá áhrifin á meðan ég lifi.“